Nuuk, 01. 09.2026

TUSAGASSIORFINNUT NALUNAARUT

KAK-p aaqqissuussaanini nukittorsarpaa – Jørgen Isak Olsen “Erni” allaffissornermut pisortanngussaaq

Kalaallit Arsaattartut Kattuffiat (KAK) aaqqissuussaanerminik nutarterinerup ingerlasup pingaarutilimmik alloriarpoq, Jørgen Isak Olsen – “Erni”-mik ilisimaneqarnerusoq – allaffissornermut pisortatut atorfinitsillugu. Atorfinitsitsineq KAK-p ulluinnarni aqutsineranik allaffissornermillu nukittorsaanissamik siunertaqarpoq, taamaalillunilu siulersuisut aalajangiinerisa, KAK-p periusissiaata ulluinnarnilu ingerlatsinerup akornanni ataqatigiinneq ersarinnerusoq pilersinneqassalluni. KAK Kalaallit Nunaanni isikkamik arsaannerup ineriartortinneqarnissaanut annertuunik anguniagaqarpoq, taamaattumillu aaqqissuussaanermik ineriartornermut malinnaasinnaasumik nukittuumik peqarusulluni. Aqutsinermik Kalaallit Nunaannilu timersornermik annertuumik misilittagaqartoq Erni aqutsinermik, allaffissornermik, aningaasaqarnermik kiisalu aaqqissuussaanermik ineriartortitsinermik ukiorpassuarni misilittagaqarpoq. Kalaallit Nunaanni ukiorpassuarni aqutsisutut atorfeqarsimavoq, ilaatigut naalakkersuisoqarfimmi pisortatut. Peqatigisaanik Kalaallit Nunaanni timersornerup iluani annertuumik misilittagaqarpoq. Ilaatigut Kalaallit Nunaanni Assammik Arsartartut Kattuffianni siulittaasuusimavoq, Kalaallit Nunaanni Timersoqatigiit Kattuffianni siulersuisuni suleqataasimalluni, kiisalu ukiorpassuarni klubbit peqatigiiffiillu iluanni suliaqarsimalluni.

KAK-p siulittaasuata Kenneth Kleist-ip atorfinitsitsineq KAK-p aaqqissuussaanerata ineriartortinneqarnerani pingaarutilittut isigaa:

“Kalaallit Nunaanni isikkamik arsaannerup ineriartortinneqarnissaanut annertuunik anguniagaqarpugut, tamannalu timersornerup tunuani nukittuumik aaqqissuussaanermik pisariaqartitsivoq. Erni aqqutigalugu aqutsisumik annertuumik misilittagalimmik pissarsivugut, peqatigisaanillu Kalaallit Nunaanni timersorneq peqatigiiffilerinerlu qanimut ilisimasaqarfigai. Taakku ataatsimoortillugit nukittoorujussuupput, KAK-llu maanna ineriartornerani pingaarutilimmik alloriarnerulluni,” Kenneth Kleist oqarpoq.

Allaffissornermut pisortatut Erni KAK-p allaffeqarfiani ulluinnarni aqutsineq akisussaaffigissavaa. Ilaatigut sulisunik aqutsineq, aningaasaqarnermik aqutsineq missingersuutinillu malitseqartitsineq, siulersuisunik direktionimillu sullissineq, aqutsinermi pitsaasumik ileqqoqarneq (governance) kiisalu allaffissornermi pitsaasunik suleriaaseqarnissap qulakkeerneqarnissaa suliassarissavai. Tamatuma saniatigut KAK-p suliniutaanik, ataatsimiititaliaanik Nunatsinnilu Pissartanngorniunnernik ataqatigiissaarinermi kiisalu ilaasortaasunik klubbinik attaveqarnermi sullissinermilu qitiusumik inissisimassaaq. Erni KAK-p direktionianut ilanngutissaaq, KAK-llu periusissiaata tigussaasunik suliniutinngortinneqarnissaanut angusanillu pilersitsinissamut peqataassalluni. Erni-p atorfininneranut atatillugu KAK pisortaqatigiimmik aaqqissuussaanermut nutaamut ikaarsaassaaq, ulluinnarni aqutsineq suliaqarfinnut pingasunut pisortanit ingerlanneqassalluni. Allannguineq KAK-p allaffissornikkut, politikkikkut nunanilu tamalaani sulinerata nukittorsarneqarnissaa siunertaralugu ingerlanneqarpoq. KAK Kalaallit Nunaanni isikkamik arsaanneq futsalerlu annertoorujussuarmik ineriartortippai, ilaatigut meeqqat inuusuttullu, klubbit ineriartortinneqarnerat, ilinniartitaaneq, turneringit, nunanut allanut unammisartut, timersornermut atortulersuutit kiisalu nunani tamalaani suleqatigiinnerit qitiutillugit.

Jørgen Isak Olsen oqarpoq:“Suliassaq assut qilanaaraara, taamatuttaaq klubbit, sulisut, siulersuisut kiisalu Kalaallit Nunaanni timersornerup ineriartortinneqarnissaanut ullut tamaasa suleqataasut suleqatiginissaat qilanaaralugu. Kalaallit Nunaanni timersorneq inuuninni ukiorpassuarni pingaarutilimmik inissisimavoq. Taamaattumik misilittakkakka atorlugit Kalaallit Nunaanni isikkamik arsaannerup aaqqissuussaanerata nukittorsarnissaanut KAK-llu anguniagaasa piviusunngortinneqarnissaannut peqataanissara qilanaaraara.”

KAK-p Erni uummammik pisumik tikilluaqquaa, suleqatigiinnissarlu kiisalu aaqqissuussaanerup ineriartortinneqarnerani immikkoortup tullia qilanaaralugu.

TUSAGASSIORFINNUT NALUNAARUT

KALAALLIT NUNAANNI ISIKKAMIK ARSAANNEQ AQQUTIGALUGU MEEQQAT INUUSUTTULLU ATUGARISSAARNERAT NUKITTORSARNEQASSAAQ

KAK aamma DBU Kalaallit Nunaanni isikkamik arsaanneq pillugu oqaluttuarisaanermut pingaarutilimmik suleqatigiinnertik nukittorsarusuppaat, meeqqat inuusuttullu atugarissaarnerat suli annertunerusumik qitiutillugu.

DBU-p siulittaasua Jesper Møller aamma Hele Danmarks Klubhus-ip siulittaasua Jens Due Olsen Nuummut tikeraarsimapput, Kalaallit Arsaattartut Kattuffiat (KAK) aamma Naalakkersuisoq Nivi Olsen ataatsimeeqatigalugit Kalaallit Nunaanni isikkamik arsaannerup siunissami ineriartortinneqarnissaa pillugu.

Tikeraarneq pivoq KAK aamma DBU ukiuni aggersuni suli qaninnerusumik suleqatigiinnissamut sinaakkutissamik nutaamik suleqatigiinnissamik isumaqatigiissummik naammassinnileruttorneranni. Meeqqat inuusuttullu qitiulluinnarput. KAK-mut isikkamik arsaanneq arsaaffimmi angusat kisiisa pineq ajorput. Isikkamik arsaanneq Kalaallit Nunaanni meeqqat inuusuttullu toqqissisimanartunik nukittuunillu ataatsimoorfeqarnissaannut sakkussat pingaarnerpaat ilaattut atorneqarsinnaavoq.

KAK-p siulittaasua Kenneth Kleist oqarpoq:

“Oqaluttuarisaanermut pingaarutilimmik suliaqaleruttorpugut. DBU-mik suleqateqarnerput Kalaallit Nunaanni isikkamik arsaannerup assigiinngitsorpassuartigut kivinneqarnissaanut iluaqutaassaaq, meeqqalli inuusuttullu qitiulluinnarput. Isikkamik arsaanneq katersuuffiusinnaavoq, pinaveersaartitsinermut iluaqutaasinnaavoq, ataatsimoornermik pilersitsisinnaavoq kiisalu meeqqat inuusuttullu atugarissaarnerannik annertusaaqataasinnaalluni. Anguniagarput tassaavoq meeqqat inuusuttullu suli amerlanerusut ukioq kaajallallugu Kalaallit Nunaannilu tamarmi isikkamik arsaannermut peqataasinnaanissaat.”

KAK-p DBU-llu suleqatigiinnissamik isumaqatigiissutissaat ilaatigut meeqqat inuusuttullu pillugit suliniutinik, klubbit ineriartortinneqarnerannik, sungiusaasunik aqutsisunillu ilinniartitaanermik kiisalu Kalaallit Nunaanni isikkamik arsaannermut sinaakkutinik nukittunerusunik ineriartortitsinermik siuarsaaniarpoq.

DBU-p siulittaasua Jesper Møller oqarpoq:

“Helsinkimi Nunani Avannarlerni ataatsimeereernermit maanna tikeqqammerpunga, nuannaarutigaaralu siullertut KAK-mut Naalakkersuisumullu Nunani Avannarlerni ikinngutitsinnit Kalaallit Nunaannut tapersersuinermik inuulluaqqussummik apuussisinnaagama, aammalu Nunani Avannarlerni tulliani ataatsimiinnissaq Kalaallit Nunaanni ingerlanneqassasoq uppernarsarsinnaagakku.

Kalaallit Nunaanni isikkamik arsaanneq pillugu anguniagaqarluarneq tunniusimalluarnerlu malugaarput. DBU-p misilittakkani atorlugit tapersersuerusuppoq, peqatigisaanillu KAK peqatigalugu Kalaallit Nunaanni pissutsinut naleqqussakkanik aaqqiissutissanik ineriartortitserusulluni. Suleqatigiinnermi periarfissarpassuaqartoq takusinnaavara, minnerunngitsumik meeqqat inuusuttullu kiisalu isikkamik arsaanermi nukittuunik ataatsimoorfiusunik ineriartortitsineq eqqarsaatigalugu. Aamma Naalakkersuisoq Nivi Olsen pitsaasorujussuarmik isumaqartoq malugivara, KAK-p DBU-llu Kalaallit Nunaanni isikkamik arsaanneq pillugu eqqarsaatersuutaat takorluugaallu tapersersorlugit.”

Nunani tamalaani isikkamik arsaanneq pillugu aaqqissuussinerit

KAK aamma DBU 2027-mi Nuummi nunani tamalaani isikkamik arsaanneq pillugu ataatsimeersuartitsinissamik pilersaaruteqarput, ilaatigut Nunani Avannarlerneersut Baltikumimeersullu kiisalu nunanit allanit attuumassuteqartunit peqataasoqassalluni. Ataatsimeersuarnermut Nunani Avannarlerni ataatsimiinnermullu ilanngullugu meeqqat inuusuttullu pillugit isikkamik arsaanneq aallaavigalugu aaqqissuussisoqarnissaa aamma pilersaarutigineqarpoq.

Sammineqartut pingaarutillit ilagaat Airdomes-inik ineriartortitsineq aamma HDK – Hele Danmarks Klubhus pillugu suliniut. Tassani Kalaallit Nunaanni kommunini tallimaasuni tamani ukioq kaajallallugu najukkani nukittuunik katersuuffiusinnaasunik pilersitsinissamut periarfissat sulissutigineqarput.

Hele Danmarks Klubhus-ip siulittaasua Jens Due Olsen oqarpoq:

“Takorluugaq isikkamik arsaanneq kisiat pilluguunngilaq, tamannalu Hele Danmarks Klubhus-imi suliniutitsinnut ineriartortitatsinnut naleqqulluarpoq. Sanaartugassat meeqqat inuusuttullu toqqissisimanartunik avatangiiseqarlutik, ukioq kaajallallugu sammisaqarlutillu ataatsimoorsinnaaneratigut atugarissaarnerisa pitsaanerulersinneqarnissaannut iluaqutaassapput, peqatigisaanillu klubbit kajumissutsimillu suliaqarneq nukittorsarneqassallutik.”

Naalakkersuisoq Nivi Olsen suleqatigiinnermik takorluukkanillu aamma nuannaarutiginnippoq, imalu oqarpoq:

“Timersorneq inuiaqatigiinni pingaarutilimmik inissisimavoq, minnerunngitsumillu meeqqatsinnut inuusuttatsinnullu. Taamaattumik KAK-p Airdomes-inik pilersitsinissaq anguniarlugu aalajangersimasumik suliaqarnera pitsaasuuvoq, taamaalilluni ukioq kaajallallugu isikkamik arsaanissamut periarfissaqalissammat. Isikkamik arsaanneq ataatsimoornermik, atugarissaarnerunermik toqqissisimanartunillu avatangiisinik pilersitseqataasinnaavoq, Kalaallit Nunaannilu tamarmi periarfissat qanoq ataatsimoorluta nukittorsarsinnaanerigut pillugit oqaloqatigiinnissaq qilanaaraara.”

Jesper Møller, Nivi Olsen, Kenneth Kleist, Jens Due Olsen

Jørgen Isak Olsen, Kenneth Kleist