Nutaarsiassat – KAK

Stay updated

Follow our team on Facebook

ANINGAASAQARNERMUT ALLAFFISSORNERMULLU PISORTAQ KAK-MUT

Kalaallit Nunaanni arsaannerup siunissaanut aningaasaqarnikkut allaffissornikkullu tunngavimmik nukittuumit pilersitseqataarusuppit?

Kalaallit Arsaattartut Kattuffiat (KAK) ineriartornermi pissanganartumiippoq, periusissatta atuutilersinneqarneranut atatillugu kattuffik nukittorsarneqarluni.

KAK qanittukkut allaffissornermut pisortamik atorfinitsitsivoq, taassumali sulilernerata kinguninngua tassanngaannartumik annaaneranik ajuusaarnartumik nalaataqarpugut.

Taamaattumik kattuffimmi qitiusumik inissisimaffimmut nutaamik suleqatissarsiorpugut, atorfimmilu aningaasaqarneq allaffissornerlu suli annertunerusumik ukkatarineqassallutik.

Taamaattumik aningaasaqarnermut allaffissornermullu pisortamik tunniusimasumik, aaqqissuussillaqqissumik aningaasaqarnermillu paasisimasaqarluartumik pissarsiorpugut.

Atorfik KAK-p ulluinnarni ingerlanneqarnerani ingerlaavartumillu ineriartortinneqarnerani qitiusumik inissisimassaaq. Atorfimmi aningaasaqarneq, allaffissorneq, sulisoqarnermut akisussaaneq kattuffiullu ulluinnarni ingerlanneqarnera ataatsimoortinneqassapput.

Peqatigisaanik KAK-p siulittaasuanut, pisortaqatigiivinut siulersuisuinullu pingaarutilimmik sparringpartneriussaatit, aalajangiussallu piviusunngortinneqarnissaat naammassineqarnissaallu qulakkeeqataaffigissallugit.

Atorfik pillugu

Aningaasaqarnermut allaffissornermullu pisortatut KAK-p aningaasaqarnikkut allaffissornikkullu ingerlanneqarneranut qullersatut akisussaaffeqassaatit. Aaqqissuussaanermik ataatsimut isiginnissinnaanermillu pilersitsissaatit, kattuffiullu aalajangiussaasa aningaasaqarnikkullu sinaakkutaasa malinneqarnissaat qulakkiissallugu.

Atorfik pingaarnertut aqutsinermut ataqatigiissaarinermullu tunngassuteqarpoq. Kattuffiup iluani suliassat assigiinngitsut ataqatigiinnissaat siuariartornissaallu qulakkiissavatit, unammiuaarnerilli, klubbinut sullissineq, pikkorissarnerit sammisassallu allat ulluinnarni piviusunngortinneqarnerat sulisut suliassaqarfinnullu akisussaasut susassaqartut isumagissavaat.

Illit suliassarissavat tapersersuineq, pingaarnersiuineq malitseqartitsinerlu – pisariaqartitsisoqartillugulu ikiuunnissamut piareersimassaatit. Atorfimmi pingaarutilik alla tassaavoq kattuffiup aningaasaqarneranik ingerlaavartumik ersarissumillu ataatsimut isiginnissinnaaneq qulakkiissallugu, tassunga ilanngullugit missingersuutit, akiliisinnaassuseq, suliniutit, tapiissutit aningaasallu siunertanut aalajangersimasunut immikkoortinneqarsimasut.

Ulluinnarni naatsorsuutinik nalunaarsuineq nammineq suliarisariaqanngilat. KAK avataaneersunik aningaasaqarnermut siunnersortinik suleqateqarpoq, kisitsisilli paasisinnaassavatit, ineriartorneq malinnaavigisinnaassallugu, apeqqutit eqqortut apeqqutigisinnaassallugit kiisalu siulittaasup, pisortaqatigiit siulersuisullu aalajangiinissamut paasissutissanik pitsaasunik nutaanillu peqarnissaat qulakkiissallugu.

Atorfik siulittaasumut atassuteqassaaq KAK-llu pisortaqatigiivinut ilaassalluni.

Suliassatit pingaarnerit

Ilaatigut makkununnga akisussaassaatit:

KAK-p aningaasaqarneranik ataatsimut aqutsineq
missingersuusiorneq, missingersuutinik malitseqartitsineq akiliisinnaassutsimillu ingerlaavartumik aqutsineq
siulittaasumut, pisortaqatigiivinut siulersuisunullu aningaasaqarnikkut nalunaaruteqartarneq
tapiissutinik, suliniutinut aningaasaliissutinik siunertanullu aalajangersimasunut immikkoortinneqarsimasunik malitseqartitsineq
KAK-p sammisassaasa suliniutaasalu aningaasaqarnikkut malinnaavigineqarnerat
avataaneersumik naatsorsuuserisumik, kukkunersiuisumik aningaasaqarnermullu siunnersortinik allanik suleqateqarneq
aningaasaqarnermut tunngatillugu uppernarsaatit, suleriaatsit malittarisassallu pitsaasut ersarissullu qulakkeernissaat
fakturanik, isumaqatigiissutinik aningaasaqarnikkullu pisussaaffinnik malitseqartitsineq
allattoqarfiup ulluinnarni allaffissornikkut aqunneqarnera ataqatigiissaarneqarneralu
allattoqarfimmi sulisunut akisussaaneq
siulersuisunik pisortaqatigiinnillu sullissineq
siulersuisut ataatsimiinnerinik, sinniisoqarfiup ataatsimiinnerinik ataatsimiititaliallu attuumassuteqartut ataatsimiinnerinik pilersaarusiorneq ataqatigiissaarinerlu
allaffissornikkut suleriaatsit pitsaasut, allagaatinik aqutsineq toqqorsiveqarnerlu qulakkeernissaat
aqutsilluarneq (governance) kiisalu siulersuisut pisortaqatigiillu aalajangiussaannik malitseqartitsineq
allaffissornikkut suliassanik immikkoortortat akimorlugit ataqatigiissaarineq malitseqartitsinerlu
sulisut akisussaasullu sammisassanik suliniutinillu piviusunngortitsineranni tapersersornissaat
KAK-p periusissiaata atuutilersinneqarneranik kattuffiullu ingerlaavartumik ineriartortinneqarneranik tapersersuineq.

KAK-mi sulisut suliassaqarfinnullu akisussaasut qanimut suleqatigissavatit, aningaasaqarnerup allaffissornerullu timersornikkut sammisassat klubbinillu ineriartortitsineq pitsaasumik tapersersorsinnaaqqullugit.

Kinaana ujagarput?

Timersornermik suliaqareersimanissat pisariaqanngilaq. Pingaarnerpaavoq aningaasaqarnermut allaffissornermullu paasisimasaqarluarnissat, kiisalu kattuffimmi sammisassarpassualimmi aaqqissuussaanermik, ataatsimut isiginnissinnaanermik siuariartornermillu pilersitsisinnaanissat.

Pingaartippagut:

aningaasaqarnermut allaffissornermullu attuumassuteqartumik misilittagaqarnissat, ajornanngippallu aqutsinermik misilittagaqarnissat
aningaasaqarnermik aqutsineq, missingersuutit naatsorsuutillu pillugit pitsaasumik ilisimasaqarnissat
aningaasaqarnikkut paasissutissanik misissueqqissaarisinnaanissat aalajangiinermullu tunngavissatut paasiuminartumik saqqummiussisinnaanissat
missingersuutinik malitseqartitsineq, akiliisinnaassuseq suliniutinullu aningaasaqarneq suliarisinnaassagitit
uppernarsaatinik, aningaasaqarnikkut suleriaatsinik pitsaasumillu aningaasaqarnermik aqutsinermik ilisimasaqarnissat
aaqqissuussaasumik sulisinnaanissat suliassarpassuillu ataatsimut isigisinnaanissaat
sulisunik aqutsinermik misilittagaqarnissat imaluunniit tamatuminnga ilisimasaqarnissat
allat suliassaannik ataqatigiissaarisinnaanissat, suliassat tamaasa nammineq suliarisariaqarnagit
siulersuisut pisortaqatigiillu qanimut suliallit pitsaasumik suleqatigisinnaanissaat
aalajangiussat iliuusinngortissinnaanissaat malitseqartinneqarnissaallu qulakkeersinnaanissaat
akisussaassuseqarnissat, aaqqiissutissanik ujartuisuunissat iliuuseqarsinnaassuseqarnissallu
nammineerlutit sulisinnaanissat suliniuteqarsinnaanissallu
suleqatiginnillaqqissuunissat soqutigisaqartorpassualimmilu kattuffimmi sulinissaq nuannarissagit
allakkatigut oqaluttariarsornikkullu pitsaasumik saqqummiussisinnaanissat.

Kalaallisut, qallunaatut tuluttullu oqaaseqarsinnaaneq iluaqutaassaaq, qinnuteqartulli piginnaasai ataatsimut isigalugit atorfimmillu kivitsisinnaassusia pingaartinnerussavagut.

Tunniussinnaasagut

KAK-mi Kalaallit Nunaanni arsaannerup ingerlaavartumik professionaliunerusumik ineriartortinneqarneranut annertuumik sunniuteqarsinnaallutit aqutsisutut qitiusumik atorfittaassaatit.

Ilaatigut makku neqeroorutigaavut:

KAK-p aqutsinerani ineriartortinneqarneranilu qitiusumik inissisimaffik
siulittaasumik, siulersuisunik pisortaqatigiinnillu qanimut suleqateqarneq
KAK-p aningaasaqarnikkut allaffissornikkullu aaqqissuussaaneranut sunniuteqarnissamut periarfissaq
kattuffimmi ineriartortuartumi suleriaatsinik pitsaasunik ersarissunillu pilersitseqataanissamut periarfissaq
klubbinut, kommuninut, suleqatinut timersornermilu kattuffinnut attaveqarluarnissaq
nunatsinni nunanilu tamalaani suleqatinik suleqateqarneq
nammineersinnaaneq akisussaaffillu annertooq
inuttut suliamullu tunngatillugu ineriartornissamut periarfissat pitsaasut
sulinermi aaqqissuussinerit eqaatsut
piginnaasat isumaqatigiissullu naapertorlugit akissarsiat.
KAK pillugu

Kalaallit Arsaattartut Kattuffiat Kalaallit Nunaanni arsaannermut immikkut kattuffiuvoq, nunarpullu tamakkerlugu arsaannerup ineriartortinnissaa anguniarlugu sulilluni. Ukiuni aggersuni meeqqat inuusuttullu, klubbit ineriartortinneqarnerat, sungiusaasunik arsaanermilu aqutsisunik (dommerinik) ilinniartitsineq, futsal, unammiuaarnerit, nunanut allanut unammisartut, atortulersuutit nunanilu tamalaani suleqatigiinnerit ineriartortinneqassapput. Peqatigisaanik sammisassat tunuanni kattuffik nukittorsarusupparput.

Aningaasaqarneq peqqissoq, allaffissorneq professionaliusoq, akisussaaffiit ersarissut suleriaatsillu pitsaasut KAK-p timersornikkut periusissiornikkullu anguniakkaminik angusaqarnissaanut pingaaruteqarluinnarput. Taamaattumik aningaasaqarnermut allaffissornermullu pisortamik KAK-p nukittuunngornissaanut, professionaliunerulernissaanut piujuartitsisumillu ineriartortinneqarnissaanut peqataarusuttumik pissarsiorpugut.

Paasissutissat pingaarutillit

Suliffissaq: KAK-p Nuummi qullersaqarfia

Sulilerfissaq: Piaartumik imaluunniit isumaqatigiissuteqarnikkut

Qinnuteqarnissamut killigititaq: 30.09.2026

Atorfininnermut atatillugu sulisunut inissamik atugassiisoqassanngilaq.

Akissarsiat atorfininnermilu atugassarititaasut piginnaasat sinaakkutillu atuuttut naapertorlugit isumaqatigiissutigineqassapput.

Qinnuteqaatit naleqquttut tigunerini atorfinitsitsinissamut oqaloqatiginninnerit ingerlaavartumik ingerlattassavagut. Taamaattumik qinnuteqarnissamut killigititaq nallertinnagu atorfik inuttalerneqarsinnaavoq, soqutiginnittullu qinnuteqaatiminnik piaartumik nassiussinissaat kaammattuutigaarput.

Qinnuteqaat attaveqarnerlu

Qinnuteqaat CV-lu uunga nassiunneqassapput:

Søren Høy

E-mail: hoy@kak.gl

Oqarasuaat: +45 21 29 70 19

Atorfik pillugu apeqqutissaqaruit imaluunniit KAK-p ineriartornera pillugu paasisaqarnerorusukkuit Søren attaviginissaanut tikilluaqqusaavutit.

TUSAGASSIORFINNUT NALUNAARUT

KALAALLIT NUNAANNI ISIKKAMIK ARSAANNEQ AQQUTIGALUGU MEEQQAT INUUSUTTULLU ATUGARISSAARNERAT NUKITTORSARNEQASSAAQ

KAK aamma DBU Kalaallit Nunaanni isikkamik arsaanneq pillugu oqaluttuarisaanermut pingaarutilimmik suleqatigiinnertik nukittorsarusuppaat, meeqqat inuusuttullu atugarissaarnerat suli annertunerusumik qitiutillugu.

DBU-p siulittaasua Jesper Møller aamma Hele Danmarks Klubhus-ip siulittaasua Jens Due Olsen Nuummut tikeraarsimapput, Kalaallit Arsaattartut Kattuffiat (KAK) aamma Naalakkersuisoq Nivi Olsen ataatsimeeqatigalugit Kalaallit Nunaanni isikkamik arsaannerup siunissami ineriartortinneqarnissaa pillugu.

Tikeraarneq pivoq KAK aamma DBU ukiuni aggersuni suli qaninnerusumik suleqatigiinnissamut sinaakkutissamik nutaamik suleqatigiinnissamik isumaqatigiissummik naammassinnileruttorneranni. Meeqqat inuusuttullu qitiulluinnarput. KAK-mut isikkamik arsaanneq arsaaffimmi angusat kisiisa pineq ajorput. Isikkamik arsaanneq Kalaallit Nunaanni meeqqat inuusuttullu toqqissisimanartunik nukittuunillu ataatsimoorfeqarnissaannut sakkussat pingaarnerpaat ilaattut atorneqarsinnaavoq.

KAK-p siulittaasua Kenneth Kleist oqarpoq:

“Oqaluttuarisaanermut pingaarutilimmik suliaqaleruttorpugut. DBU-mik suleqateqarnerput Kalaallit Nunaanni isikkamik arsaannerup assigiinngitsorpassuartigut kivinneqarnissaanut iluaqutaassaaq, meeqqalli inuusuttullu qitiulluinnarput. Isikkamik arsaanneq katersuuffiusinnaavoq, pinaveersaartitsinermut iluaqutaasinnaavoq, ataatsimoornermik pilersitsisinnaavoq kiisalu meeqqat inuusuttullu atugarissaarnerannik annertusaaqataasinnaalluni. Anguniagarput tassaavoq meeqqat inuusuttullu suli amerlanerusut ukioq kaajallallugu Kalaallit Nunaannilu tamarmi isikkamik arsaannermut peqataasinnaanissaat.”

KAK-p DBU-llu suleqatigiinnissamik isumaqatigiissutissaat ilaatigut meeqqat inuusuttullu pillugit suliniutinik, klubbit ineriartortinneqarnerannik, sungiusaasunik aqutsisunillu ilinniartitaanermik kiisalu Kalaallit Nunaanni isikkamik arsaannermut sinaakkutinik nukittunerusunik ineriartortitsinermik siuarsaaniarpoq.

DBU-p siulittaasua Jesper Møller oqarpoq:

“Helsinkimi Nunani Avannarlerni ataatsimeereernermit maanna tikeqqammerpunga, nuannaarutigaaralu siullertut KAK-mut Naalakkersuisumullu Nunani Avannarlerni ikinngutitsinnit Kalaallit Nunaannut tapersersuinermik inuulluaqqussummik apuussisinnaagama, aammalu Nunani Avannarlerni tulliani ataatsimiinnissaq Kalaallit Nunaanni ingerlanneqassasoq uppernarsarsinnaagakku.

Kalaallit Nunaanni isikkamik arsaanneq pillugu anguniagaqarluarneq tunniusimalluarnerlu malugaarput. DBU-p misilittakkani atorlugit tapersersuerusuppoq, peqatigisaanillu KAK peqatigalugu Kalaallit Nunaanni pissutsinut naleqqussakkanik aaqqiissutissanik ineriartortitserusulluni. Suleqatigiinnermi periarfissarpassuaqartoq takusinnaavara, minnerunngitsumik meeqqat inuusuttullu kiisalu isikkamik arsaanermi nukittuunik ataatsimoorfiusunik ineriartortitsineq eqqarsaatigalugu. Aamma Naalakkersuisoq Nivi Olsen pitsaasorujussuarmik isumaqartoq malugivara, KAK-p DBU-llu Kalaallit Nunaanni isikkamik arsaanneq pillugu eqqarsaatersuutaat takorluugaallu tapersersorlugit.”

Nunani tamalaani isikkamik arsaanneq pillugu aaqqissuussinerit

KAK aamma DBU 2027-mi Nuummi nunani tamalaani isikkamik arsaanneq pillugu ataatsimeersuartitsinissamik pilersaaruteqarput, ilaatigut Nunani Avannarlerneersut Baltikumimeersullu kiisalu nunanit allanit attuumassuteqartunit peqataasoqassalluni. Ataatsimeersuarnermut Nunani Avannarlerni ataatsimiinnermullu ilanngullugu meeqqat inuusuttullu pillugit isikkamik arsaanneq aallaavigalugu aaqqissuussisoqarnissaa aamma pilersaarutigineqarpoq.

Sammineqartut pingaarutillit ilagaat Airdomes-inik ineriartortitsineq aamma HDK – Hele Danmarks Klubhus pillugu suliniut. Tassani Kalaallit Nunaanni kommunini tallimaasuni tamani ukioq kaajallallugu najukkani nukittuunik katersuuffiusinnaasunik pilersitsinissamut periarfissat sulissutigineqarput.

Hele Danmarks Klubhus-ip siulittaasua Jens Due Olsen oqarpoq:

“Takorluugaq isikkamik arsaanneq kisiat pilluguunngilaq, tamannalu Hele Danmarks Klubhus-imi suliniutitsinnut ineriartortitatsinnut naleqqulluarpoq. Sanaartugassat meeqqat inuusuttullu toqqissisimanartunik avatangiiseqarlutik, ukioq kaajallallugu sammisaqarlutillu ataatsimoorsinnaaneratigut atugarissaarnerisa pitsaanerulersinneqarnissaannut iluaqutaassapput, peqatigisaanillu klubbit kajumissutsimillu suliaqarneq nukittorsarneqassallutik.”

Naalakkersuisoq Nivi Olsen suleqatigiinnermik takorluukkanillu aamma nuannaarutiginnippoq, imalu oqarpoq:

“Timersorneq inuiaqatigiinni pingaarutilimmik inissisimavoq, minnerunngitsumillu meeqqatsinnut inuusuttatsinnullu. Taamaattumik KAK-p Airdomes-inik pilersitsinissaq anguniarlugu aalajangersimasumik suliaqarnera pitsaasuuvoq, taamaalilluni ukioq kaajallallugu isikkamik arsaanissamut periarfissaqalissammat. Isikkamik arsaanneq ataatsimoornermik, atugarissaarnerunermik toqqissisimanartunillu avatangiisinik pilersitseqataasinnaavoq, Kalaallit Nunaannilu tamarmi periarfissat qanoq ataatsimoorluta nukittorsarsinnaanerigut pillugit oqaloqatigiinnissaq qilanaaraara.”

Jesper Møller, Nivi Olsen, Kenneth Kleist, Jens Due Olsen

Jørgen Isak Olsen, Kenneth Kleist