(KAK, danskisut: Grønlands Boldspil Union) Kalaallit Nunaanni Arsaattartut Kattuffiat kattuffiuvoq immikkut ittoq, Kalaallit Nunaanni arsaannermut tamanut tunngasunik aaqqissuussisoq. 1971-imi juulip 4-ni arsaattartut kattuffiat pilersinneqarpoq. KAK-p siunertaraa kalaallit arsaattartut kattuffiattut pisortatigoortumik nunanut allanut sinniisuunissaq kiisalu nunami nunanilu allani kalaallit arsaannerannik siuarsaanissaq ineriartortitsinissarlu. 

Peqatigiiffik siulersuisunit arfineq-marlunnik ilaasortaqartunit aqunneqarpoq. Siulittaasoq sinniisut ataatsimiinneranni ukiumut marlunnut qinerneqartarpoq. Ukiut allortarlugit siulersuisunut ilaasortat pingasut sisamat qinerneqartarput, siulersuisut ataqatigiissumik attakkuminartumillu sulinissaat qulakkeerniarlugu. 

Ullumikkut kattuffik 38-nik ilaasortaqarpoq, katillugit 5500-t missaanniittut arsartut ilaasortatut nalunaarsorneqarsimapput, tamannalu isumaqarpoq  Kalaallit Nunaanni innuttaasut 10 procentii missaat arsaattartuusut. Kalaallit Nunaanni arsaattartut tamarmik akissarsiutiginagu arsaattartuupput. 

Pissartanngorniuunnerit tulleriiaarlutik ima ingerlanneqartarput. 

• Utoqqasaat Arnat/Angutit (Futsalimi kisimi)
• Angutit/Arnat inersimasut
• U-19
• U-17
• U-15
• U-13
• U11

  Taakkua saniatigut nukappiaqqat/niviarsiaqqat, U8-t, meeqqallu mikinerit nunap immikkoortuini unammiuaartarput. 

KAK Nuummi qullersaqarfeqarpoq, Nike Berthelsenimiit pigineqartoq. KAK Kalaallit Nunaanni Timersoqatigiit Kattuffiannut ilaasortaavoq, ConiFA, Island Games aamma Arctic Winter Games International ilanngullugit ilaasortaaffigivai.